जालना अनुदान घोटाळा प्रकरण : तलाठींना मदत करणारे कोतवाल व एजंट अटकेत

 तीन आरोपींना न्यायालयाने ४ दिवसांची सुनावली पोलीस कोठडी

वास्तव न्युज ओमप्रकाश उढाण 

       अंबड व घनसावंगी तालुक्यात झालेल्या अतिवृष्टी आणि नैसर्गिक आपत्तीमुळे बाधित शेतकऱ्यांना शासनाकडून देण्यात येणाऱ्या अनुदानाच्या वाटपामध्ये तब्बल ₹२४ कोटी ९० लाख ७७ हजार ८११ रुपयांचा घोटाळा उघड झाला आहे. या प्रकरणी आर्थिक गुन्हे शाखा, जालना पोलिसांनी आज आणखी दोन आरोपींना अटक केली असून त्यांना न्यायालयाने ४ दिवसांची पोलीस कोठडी सुनावली आहे.

     अंबड पोलीस ठाण्यात गुन्हा दाखल आहे. या गुन्ह्याचा तपास आर्थिक गुन्हे शाखा करत आहे.

आधीच महसूल अधिकाऱ्याला अटक

    या प्रकरणात यापूर्वी सहाय्यक महसूल अधिकारी सुशिलकुमार दिनकर जाधव यांना अटक करण्यात आली होती. ते सध्या जिल्हा कारागृहात आहेत. त्यानंतर तहसील कार्यालय, अंबड येथे कार्यरत तलाठी शिवाजी श्रीधर ढालके (रा. उमरी बाजार, ता. दर्यापुर, जि. अमरावती) यांना १९ सप्टेंबर रोजी अटक करून पीसीआर मध्ये ठेवण्यात आले आहे. तपासात ढालके यांनी त्यांच्या मूळ गावी उमरी बाजारातील ५० हून अधिक लोकांची नावे अंबड तालुक्यातील सजेतील दाढेगाव येथे दाखल करून त्यातून बोगस लाभ घेतल्याचे निष्पन्न झाले आहे.

एजंट व कोतवालांचा सहभाग

    तपासादरम्यान तलाठ्यांना सहाय्य करणाऱ्या एजंट आणि कोतवालांचा थेट सहभाग उघडकीस आला आहे. त्यामुळे

1. कोतवाल मनोज शेषराव उघडे (रा. दाढेगाव, ता. अंबड)

2. खाजगी सहाय्यक साहेबराव उत्तमराव तुपे (रा. पिठोरी सिरसगाव, ता. अंबड)

    यांना काल रात्री अटक करण्यात आली. आज न्यायालयात हजर केल्यानंतर त्यांना ४ दिवसांची पोलीस कोठडी सुनावण्यात आली.

घोटाळ्याची पद्धत

    तलाठ्यांनी मोठ्या प्रमाणावर बोगस नावे अनुदान यादीत टाकण्यासाठी एजंट व सहाय्यकांचा वापर केला. त्याबदल्यात या एजंटांना टक्केवारीनुसार आर्थिक लाभ देण्यात आल्याचे तपासात स्पष्ट झाले आहे. या प्रकारातून मोठा अपहार झाल्याने पोलिसांनी उर्वरित आरोपींचा शोध सुरू केला आहे.

पोलिसांची कारवाई

    ही कारवाई जालना जिल्हा पोलीस अधीक्षक अजयकुमार बन्सल, अपर पोलीस अधीक्षक आयुष नोपाणी, प्रभारी उपविभागीय पोलीस अधिकारी (आर्थिक गुन्हे शाखा) सिद्धार्थ माने यांच्या मार्गदर्शनाखाली करण्यात आली. सदर मोहिमेत पोलिस निरीक्षक मिथुन घुगे तसेच पोलिस अधिकारी व कर्मचारी आदींनी महत्त्वपूर्ण भूमिका बजावली.