निवृत्त मुख्याध्यापकाला तोतया पोलिसांनी लुटले !

सव्वादोन लाखांचे दागिने केले गायब

वास्तव न्युज ओमप्रकाश उढाण 

      जालना जिल्ह्यातील अंबड शहरात बुधवारी दुपारी एक धक्कादायक घटना घडली. यात दिवसाढवळ्या निवृत्त मुख्याध्यापकाला तोतया पोलिसांनी लुटले. मत्स्योदरी हायस्कूलचे निवृत्त मुख्याध्यापक उत्तमराव विठ्ठलराव शिंदे (वय ७२) यांना दोन तोतया पोलिसांनी दिशाभूल करून तब्बल दोन लाख पंचवीस हजार रुपयांचे सोन्याचे दागिने लुटले. यामुळे अंबड शहरात एकाच खळबळ उडाली.

       शिंदे हे सायंकाळी साडेपाचच्या सुमारास जालना रोडवरील किराणा दुकानातून सामान घेऊन स्कुटीवरून घराकडे जात होते. त्यावेळी मोटारसायकलवरून आलेल्या दोन इसमांनी त्यांना अडवले. आम्ही पोलीस असून शहरात चोरीच्या प्रकरणानिमित्त वाहने तपासणी सुरू असल्याचे सांगून त्यांनी शिंदे यांची तपासणी केली.

      या दरम्यान त्यांनी शिंदे यांना हातातील घड्याळ, खिशातील रोख रक्कम, औषधी, तसेच सोन्याच्या अंगठ्या व लॉकेट एका रुमालात बांधण्यास भाग पाडले. मात्र घरी गेल्यावर रुमाल उघडून पाहता त्यात सोन्याचे दागिने गायब असल्याचे लक्षात आले.

     शिंदे यांनी तात्काळ अंबड पोलिस ठाण्यात धाव घेऊन तक्रार दाखल केली. पोलिसांनी अज्ञात दोघांविरुद्ध गुन्हा नोंदवला असून सपोनि अमोल गुर्ले तपास करीत आहेत. या घटनेमुळे अंबड शहरात खळबळ उडाली आहे.