सर्पदंशाने घेतले दोन निष्पाप जीवांचे बळी: सख्या भावंडांचा मध्यरात्री मृत्यू

 अत्यंत हृदयद्रावक आणि दुर्दैवी घटना 

वास्तव न्युज ओमप्रकाश उढाण 

    २४ मे रोजी मध्यरात्री घडलेल्या एका अत्यंत हृदयद्रावक आणि दुर्दैवी घटनेने संपूर्ण गावाला हादरवून टाकले आहे. एका कुटुंबातील दोन निष्पाप चिमुकल्यांचा सर्पदंशामुळे मृत्यू झाला असून, या घटनेमुळे गावावर शोककळा पसरली आहे.

    बीड जिल्ह्यातील धारूर तालुक्यातील कोयाळ गावात २४ मेच्या मध्यरात्री घडलेली एक हृदयद्रावक घटना संपूर्ण गावाला हादरवून गेली आहे. प्रदीप मधुकर मुंडे यांच्या घरात झोपेत असलेल्या त्यांच्या सख्या मुलगा व मुलीचा सर्पदंशामुळे दुर्दैवी मृत्यू झाला.

   सात वर्षांची कोमल आणि पाच वर्षांचा शिवम हे रात्री साधारणतः १२ ते १ वाजेच्या दरम्यान झोपेत असताना त्यांच्या अंगावर साप चढून गेला आणि त्याने दोघांनाही दंश केला. काही वेळातच दोघांची प्रकृती खालावली. कुटुंबीयांनी तातडीने दोघांना उपचारासाठी रुग्णालयात नेले, मात्र उपचार सुरू होण्यापूर्वीच दोघांचाही दुर्दैवी मृत्यू झाला.

    या घटनेने मुंडे कुटुंबीयांवर दुःखाचा डोंगर कोसळला असून, संपूर्ण कोयाळ गावावर शोककळा पसरली आहे. निष्पाप वयात दोन चिमुकल्यांचा असा अकाली मृत्यू झाल्याने गावकऱ्यांच्या डोळ्यांत अश्रू आहेत.