शशिकांत हातगल जालन्याचे नवे निवासी उपजिल्हाधिकारी

उप जिल्हाधिकारी संवर्गातील अधिकाऱ्यांच्या पदस्थापना-आदेश जाहीर

वास्तव न्यूज ओमप्रकाश उढाण

   महाराष्ट्र शासनाच्या महसूल व वन विभागाने उप जिल्हाधिकारी संवर्गातील अधिकाऱ्यांच्या बदली व पदस्थापनेबाबत महत्त्वाचा आदेश दिनांक २६ सप्टेंबर २०२५ रोजी जारी केला आहे. प्रशासकीय कारणास्तव व सार्वजनिक सेवेच्या हितार्थ हा निर्णय घेण्यात आला असून संबंधित अधिकाऱ्यांना तात्काळ नव्या पदावर रुजू होण्याचे निर्देश देण्यात आले आहेत.

    शासन आदेश क्र. बदली-०९२५/प्र.क्र. २२३/९/आस्था-२ (ई-१३५२१०२) नुसार, उप जिल्हाधिकारी शशिकांत हातगल यांची उप जिल्हा निवडणूक अधिकारी, जालना या पदावरून निवासी उप जिल्हाधिकारी, जालना या पदावर पदस्थापना करण्यात आली आहे.

   संबंधित अधिकाऱ्यांनी २६ सप्टेंबर २०२५ पासून कार्यमुक्त होऊन नव्या पदावर तात्काळ रुजू व्हावे, असे आदेशात स्पष्ट करण्यात आले आहे. सदरील आदेश उप सचिव महेश वरूडकर यांनी काढला आहे.

    दरम्यान, शशिकांत हातगल यांनी यापूर्वी काही वर्षे अंबड येथील उपविभागीय अधिकारी म्हणून कामकाज पाहिले होते. त्यावेळी निवडणूक विभागात काम करत असताना त्यांनी नव नवीन संकल्पना राबविल्या. त्यानंतर ते उप जिल्हाधिकारी, जालना या पदावर कार्यरत होते. 

     त्यांच्या कार्यकाळात विविध प्रशासकीय कामकाज पार पाडून त्यांनी चांगली कामगिरी बजावली आहे. तसेच औरंगाबाद येथेही काही दिवस त्यांनी उपजिल्हाधिकारी तथा दंडधिकारी म्हणून काम पाहिले होते.

    या पदस्थापनेनंतर आता शशिकांत हातगल हे जालना जिल्ह्यातील नवे निवासी उप जिल्हाधिकारी म्हणून कामकाज पाहणार आहेत.