मुंबईत आंदोलनादरम्यान लातुरातील मराठा आंदोलकाचा मृत्यू

 

वास्तव न्युज ओमप्रकाश उढाण 

      मराठा आरक्षणाच्या मागणीसाठी आझाद मैदानावर सुरू असलेल्या आंदोलनादरम्यान लातुरातील एका आंदोलनकर्त्याचा मृत्यू झाल्याची दुःखद घटना घडली आहे. विजयकुमार घोगरे (रा. टाकलगाव, ता. अहमदपूर, जि. लातूर) असे मृत व्यक्तीचे नाव असून त्यांचा हृदयविकाराच्या झटक्याने मृत्यू झालाय अशी माहिती हाती येत आहे.

   आंदोलनासाठी राज्यभरातून हजारो आंदोलक मुंबईत दाखल झाले आहेत. मात्र, तिथे राहण्यापासून ते जेवणापर्यंत प्रचंड हाल होत असल्याचे चित्र स्पष्टपणे दिसून येत आहे. अशाच प्रतिकूल परिस्थितीत आंदोलनात सहभागी झालेल्या लातुरातील कार्यकर्त्याचा जीव गेला आहे. या घटनेमुळे आंदोलनकर्त्यांमध्ये हळहळ व्यक्त केली जात असून शोककळा पसरली आहे.

       विजयकुमार घोगरे हे मराठा आरक्षण लढ्यातील एक बिनीचे शिलेदार मानले जात होते. त्यांच्या निधनाने मराठा समाजाने आणखी एक हिम्मतीचा मोती गमावला आहे. स्थानिक ग्रामस्थ व सहकाऱ्यांनी व्यक्त केलेल्या भावना अतिशय वेदनादायी होत्या. निःशब्द... दुर्दैवी घटना... आणखी एक मोती गळून पडला,अशा शब्दांत कार्यकर्त्यांनी दुःख व्यक्त केले.