रिलच्या नादात जीवाशी खेळ! स्टंट करताना कार ३०० फूट दरीत कोसळली

 युवकाची प्रकृती चिंताजनक 

वास्तव न्युज ओमप्रकाश उढाण 

      सातारा जिल्ह्यातील पाटण तालुक्यातील सडावाघापूर येथील टेबल पॉईंट या प्रसिद्ध पर्यटनस्थळी बुधवारी दुपारी ४ वाजता एक धक्कादायक घटना घडली. एक तरुण सोशल मीडियावर रिल बनवण्यासाठी स्टंट करत असताना त्याची चारचाकी थेट ३०० फूट खोल दरीत कोसळली. या भीषण अपघातात चालक गंभीर जखमी झाला असून त्याची प्रकृती चिंताजनक आहे.

➤ घटनेची प्राथमिक माहिती

     साहिल अनिल जाधव (वय २६, रा. गोळेश्वर, ता. कराड) हा आपल्या मित्रांसोबत सडावाघापूर येथील टेबल पॉईंट परिसरात फिरायला गेला होता. टेबल पॉईंट हे स्थान दोन्ही बाजूंनी खोल दऱ्यांनी वेढलेले असून साहसी दृश्यांसाठी प्रसिद्ध आहे. साहिल आपल्या व्हॅनसह स्टंट करत होता. त्याने रिव्हर्स गिअर टाकून गोलगोल गाडी फिरवण्याचा प्रयत्न केला आणि या सर्व प्रकाराचा व्हिडिओ रेकॉर्ड करत होता. काही सेकंदात नियंत्रण सुटले आणि गाडी थेट खोल दरीत कोसळली.

➤ दरीतून जीवघेणी पडझड – व्हिडिओ व्हायरल

    या घटनेचा अवघ्या पाच सेकंदांचा थरारक व्हिडिओ सोशल मीडियावर व्हायरल झाला आहे. व्हिडिओमध्ये गाडी झपाट्याने दरीत घसरताना दिसून येते. साहिल याचे मित्र फोटो काढत होते, त्याचवेळी गवतावरून गाडी घसरली आणि भीषण अपघात घडला.

➤ तात्काळ बचावकार्य आणि मदतीचा ओघ

    घटनेची माहिती मिळताच मंगेश जाधव यांनी घटनास्थळी धाव घेत साहिलला सुखरूप बाहेर काढले. यामध्ये किंगमेकर अकॅडमीचे विकास संकपाळ, त्यांचे विद्यार्थी, पाटण पोलीस स्टेशनचे पोलीस निरीक्षक कवठेकर, तसेच अमित जाधव यांचा मोलाचा सहभाग होता. साहिलला तत्काळ रुग्णालयात दाखल करण्यात आले असून, त्याच्यावर उपचार सुरू आहेत.

➤ पोलीस आणि प्रशासन सतर्क – कडक कारवाईचे संकेत

   या घटनेनंतर स्थानिक पोलीस आणि प्रशासनाने अशा स्टंट्सना आळा घालण्यासाठी कठोर उपाययोजना करण्याचे संकेत दिले आहेत. टेबल पॉईंटसारख्या धोकादायक ठिकाणी स्टंट करणं किंवा व्हिडिओ शूट करणं हे अत्यंत जीवघेणे ठरू शकते.

तरुणांनो, थोड्याशा प्रसिद्धीसाठी जीवाशी खेळ नको!

   सध्या सोशल मीडियावर प्रसिद्ध होण्यासाठी अनेक तरुण जीवघेण्या स्टंट्स करताना दिसतात. मात्र, थोड्याशा "लाइक" आणि "व्ह्यूज"च्या नादात अनेकांचे आयुष्य धोक्यात येत आहे. ही घटना इतरांसाठी मोठा धडा आहे. स्टंट टाळा – आयुष्य वाचवा!

🔴 रिलसाठी नाही, तर सुरक्षित आयुष्यासाठी जगा!

💬  "थोडीशी प्रसिद्धी आयुष्यापेक्षा महत्त्वाची नाही!"