पंढरपूरला पायी निघालेल्या अंबड तालुक्यातील वारकऱ्याचा मृत्यू

हृदयविकाराच्या झटक्याने झाला मृत्यू 

वास्तव न्युज ओमप्रकाश उढाण 

     आषाढी एकादशीच्या निमित्ताने पंढरपूरच्या दिशेने पायी दिंडीत सहभागी झालेल्या जालना जिल्ह्यातील अंबड तालुक्यातील रोहीलागड येथील एक वारकऱ्याचा हृदयविकाराच्या तीव्र झटक्याने मृत्यू झाल्याची दुःखद घटना सोमवारी घडली.

      मिळालेल्या माहितीनुसार, रामेश्वर लिंबाजी पाटील (वय ५५) हे वारकरी संप्रदायातील निष्ठावान भक्त होते. गेल्या अनेक वर्षांपासून ते आषाढी एकादशीला पंढरपूरला पायी जाणाऱ्या माऊलीच्या दिंडीत नियमितपणे सहभागी होत असत. यंदाही पंढरपूरच्या दिशेने दिंडीत सहभागी होऊन ते मार्गस्थ होते.

     सोमवारी दुपारी दोन वाजेच्या सुमारास नातेपुते पाटी या ठिकाणी दिंडी सुरु असताना त्यांना अचानक हृदयविकाराचा तीव्र झटका आला. उपस्थित वारकऱ्यांनी तातडीने मदत करण्याचा प्रयत्न केला, मात्र तत्काळ उपचार मिळण्यापूर्वीच त्यांचे निधन झाले.

     या घटनेची माहिती मिळताच पाटील यांचे नातेवाईक, मित्रमंडळी आणि गावकरी थेट नातेपुते येथे पोहोचले. त्यानंतर त्यांच्या पार्थिवावर मूळगाव रोहीलागड येथे मंगळवारी (दि. १ जुलै) सकाळी गावातील स्मशानभूमीत शोकाकुल वातावरणात अंत्यसंस्कार करण्यात आले.

    त्यांच्या पश्चात पत्नी, दोन मुले, दोन मुली असा परिवार आहे. पाटील कुटुंबीयांवर ही अपूरणीय दुःखाची वेळ कोसळली असून परिसरातील ग्रामस्थ, नातेवाईक, मित्रपरिवार यांनी कुटुंबीयांना धीर दिला आहे.