आषाढी वारीत दुर्दैवी घटना: अंबड तालुक्यातील युवक नदीत बुडाला !

संत तुकाराम महाराज पालखी दिंडीतला युवक निरा नदीत बुडाला; माजी मंत्री राजेश टोपे यांनी घेतली घटनास्थळी भेट

वास्तव न्युज ओमप्रकाश उढाण 

     पंढरपूर आषाढी वारीच्या पार्श्वभूमीवर संतश्रेष्ठ तुकाराम महाराज पालखी क्रमांक १२ अंतर्गत सहभागी असलेल्या गोविंद कल्याणराव फोके (वय अंदाजे १७) या युवकाचा निरा नदीत बुडाल्याची घटना आज मंगळवारी घडली.

   गोविंद फोके हा जालना जिल्ह्यातील अंबड तालुक्यातील झिरपी गावचा रहिवासी असून, तो आपल्या आजीबरोबर मस्के महाराज दिंडी क्रमांक १२ सोबत आषाढी वारीसाठी पंढरपूरकडे निघाला होता. सराटी पुलाजवळील निरा नदीत आंघोळीसाठी उतरलेला असताना तो पाण्याच्या प्रवाहात वाहून गेला.

माजीमंत्री राजेश टोपे यांची भेट 

      या संपूर्ण घटनेची दखल घेत माजी आरोग्यमंत्री राजेश टोपे यांनी घटनास्थळी भेट दिली. त्यांनी विभागीय आयुक्त, जिल्हाधिकारी व तहसीलदार यांच्याशी फोनवरून संवाद साधून शोधमोहीम तातडीने सुरू ठेवण्याच्या सूचना दिल्या. 

     सध्या परिसरात आपत्ती व्यवस्थापनाचे पथक, पोलीस व स्थानिक स्वयंसेवक युवकाचा शोध घेत आहेत. या दुर्घटनेमुळे संत तुकाराम महाराज पालखीतील व सर्वच वारकऱ्यांमध्ये हळहळ व्यक्त होत आहे.

    मात्र ४:३० वाजेपर्यंत पोलिस व ग्रामस्थ सोडता इतर आपत्ती व्यवस्थापनाचे पथक दाखल झालेले नव्हते अशी माहिती नातेवाईकांकडून मिळाली.

    दरम्यान पावसाळ्याचे दिवस सुरू असल्यामुळे युवा व युवती तसेच सर्वांनी काळजी घेणे गरजेचे आहे. दिंडीत जाणाऱ्या भाविक भक्तांनी पाणी, रस्ता, वाहतूक, आपली वाहने, नदी आदी ठिकाणी विशेष काळजी घेणे गरजेचे आहे.