अंगावर ट्रॅक्टर पलटी होऊन शेतकऱ्याचा मृत्यू , एक गंभीर जखमी

 रोटावेटर घसरल्याने ट्रॅक्टरचा तोल सुटला आणि ट्रॅक्टर पलटी झाला

वास्तव न्युज ओमप्रकाश उढाण 

        अंबड तालुक्यातील घुंगर्डे हादगाव परिसरात आज (दि. २४ जून) दुपारी सुमारास ट्रॅक्टर पलटी होऊन झालेल्या भीषण अपघातात एकजण जागीच ठार झाला, तर एक १४ वर्षांचा मुलगा गंभीर जखमी झाला आहे. मृत व्यक्तीचे नाव अण्णासाहेब नामदेव गव्हाणे (वय ३८) असून, जखमी मुलाचे नाव गोपाल विष्णु सिंग पवार (वय १४) असे आहे.

      ही घटना मंगळवारी दुपारच्या सुमारास घुंगर्डे हादगाव–तिर्थपुरी रोडवरील चारी क्रमांक २२ येथे घडली. ट्रॅक्टरवरील रोटावेटर (शेतकामासाठी वापरण्यात येणारे यंत्र) घसरल्याने ट्रॅक्टरचा तोल सुटला आणि ट्रॅक्टर पलटी झाला. यामध्ये अण्णासाहेब गव्हाणे हे ट्रॅक्टरखाली दबून जागीच ठार झाले, तर गोपाल पवार गंभीर जखमी झाला.

      घटनेनंतर परिसरातील ग्रामस्थांनी धाव घेतली आणि जेसीबीच्या सहाय्याने मृतदेह बाहेर काढण्यात आला. अण्णासाहेब गव्हाणे यांचा मृतदेह शवविच्छेदनासाठी प्राथमिक आरोग्य केंद्रात हलविण्यात आला असून, जखमी गोपाल पवार याला तात्काळ अंबड येथील उपजिल्हा रुग्णालयात उपचारासाठी दाखल करण्यात आले आहे.

     या अपघातामुळे घुंगर्डे हादगाव परिसरात शोककळा पसरली असून, अण्णासाहेब गव्हाणे यांच्या निधनामुळे गावात हळहळ व्यक्त केली जात आहे. पुढील तपास अंबड पोलीस करत आहेत.