जालन्यात खताचा २० लाखांचा बेकायदेशीर साठा जप्त

 जालना कृषी विभागाची मोठी कारवाई: चंदनझीरा पोलिस ठाण्यात गुन्हा दाखल..

वास्तव न्युज ओमप्रकाश उढाण 

   खरीप हंगामाच्या पार्श्वभूमीवर जालना जिल्ह्यात कृषी विभागाने मोठी कारवाई करत उत्पादनास बंदी असलेल्या फॉस्फोजप्सिम या खताचा तब्बल २० लाख रुपये किमतीचा ३२० मेट्रिक टन साठा जप्त केला आहे. ही धडक कारवाई २८ मे बुधवार रोजी करण्यात आली असून, त्यामुळे कृषी व खत क्षेत्रात खळबळ उडाली आहे.

       सदरील कारवाई कृष्णा फास्केईम लिमिटेड या कंपनीच्या जालना-राजूर मार्गावरील गुंडेवाडी शिवारात भाड्याने घेतलेल्या दोन गोदामांवर करण्यात आली. रेल्वे रॅकद्वारे जालना जिल्ह्यात येणाऱ्या खतांची कृषी विभागाकडून नियमित तपासणी केली जाते. त्याच दरम्यान, काही गोपनीय माहितीच्या आधारे कृषी विभागाच्या पथकाने या गोदामांवर छापा टाकला असता बंदी असलेल्या फॉस्फोजप्सिम खताचा मोठा साठा आढळून आला.

     ऑक्टोबर २०२४ नंतर शासनाने फॉस्फोजप्सिम या खताच्या उत्पादन व वापरावर बंदी घातली असूनही संबंधित कंपनीकडून बेकायदेशीररित्या साठवणूक केली जात होती. जप्त करण्यात आलेला साठा सील करण्यात आला आहे.

  

     ही कारवाई विभागीय कृषी सहसंचालक कार्यालयाचे गुण नियंत्रक आशिष काळुसे, जिल्हा कृषी अधिकारी विशाल गायकवाड, मोहीम अधिकारी निलेशकुमार भदाणे, विभागीय कृषी सहसंचालक पी.आर. देशमुख, जिल्हा कृषी अधिकारी जी.डी. कापसे, कृषी विकास अधिकारी पी.बी. बनसावडे यांच्या नेतृत्वाखाली करण्यात आली. कारवाई खरीप हंगामाच्या सुरुवातीला शेतकऱ्यांसाठी गुणवत्तापूर्ण खत पुरवठा सुनिश्चित करण्यासाठी महत्त्वपूर्ण ठरली आहे.

 या प्रकरणी कंपनीच्या कायदेशीर जबाबदार व्यक्तींसह संचालक मंडळाविरुद्ध खत नियंत्रण आदेश नुसार चंदनझीरा पोलीस ठाण्यात संबंधित कंपनी व आणखीन एकाविरुद्ध गुन्हा दाखल करण्यात आला असून या घटनेचा पुढील तपास चंदनझिरा पोलीस करीत आहे.