कालव्यात पडून दहा वर्षीय मुलाचा दुर्दैवी मृत्यू; १२ किमी अंतरावर सापडला मृतदेह

 

वास्तव न्युज ओमप्रकाश उढाण 

   जायकवाडी च्या कालव्यात पडल्याने दहा वर्षीय मुलगा वाहून गेल्याची अतिशय दुर्दैवी घटना २६ मार्च बुधवार रोजी घडली. शोध घेतल्यानंतर बारा किमीवर अंतरावर त्याचा मृतदेह सापडला.

    बीड जिल्ह्यातील गेवराई तालुक्यातील तलवाडा येथे २६ मार्च, बुधवार रोजी एक अतिशय दुर्दैवी घटना घडली. दहा वर्षीय अमर शिवाजी लोखंडे या मुलाचा कालव्यात पडून वाहून गेल्याने मृत्यू झाला. कुटुंबीय आणि पोलीस प्रशासनाने त्याचा शोध सुरू केला, मात्र काल मृतदेह सापडला नाही. आज सकाळी पुन्हा शोध मोहीम सुरू केल्यानंतर दुपारी जातेगाव शिवारात, तब्बल १२ किलोमीटर अंतरावर, मुलाचा मृतदेह आढळून आला.

   अमर लोखंडे, गणेशनगर भागातील रहिवासी, हा काल दुपारी काही मित्रांसह कालव्यावर पोहण्यासाठी गेला होता. पाण्यात पडल्याने तो वाहून गेला आणि त्यानंतर पाण्याच्या प्रवाहात बुडाला. सोबत गेलेल्या मुलांनी तातडीने घरी जाऊन कुटुंबीयांना ही माहिती दिली. कुटुंबीयांनी लगेच कालव्याकडे धाव घेतली, मात्र त्याचा पत्ता लागला नाही.

   शोधकार्य सुरू असताना तलवाडा पोलीस ठाण्याचे सहायक पोलीस निरीक्षक सोमनाथ नरके, विठ्ठल गायकवाड, सचिन कोरडे, विठ्ठल चव्हाण आदींनी दिवसभर शोध मोहीम राबवली तसेच मच्छीमार मुलांच्या मदतीने आणि कालव्यात जाळे टाकून शोध घेण्यात आला. अखेर आज सकाळी अमरचा मृतदेह जातेगाव शिवारात सापडला.

   हा घटनाक्रम तलवाडा गावातील नागरिकांसाठी अत्यंत धक्कादायक ठरला आहे.लोखंडे या लहान मुलाचा मृत्यू झाल्याने गावात हळहळ व्यक्त होत आहे. अमरच्या मृत्यूमुळे त्याच्या कुटुंबीयांवर शोककळा पसरली असून, नागरिकांमध्ये या घटनेमुळे चिंतेचे वातावरण आहे.