आयपीएस अधिकारी सुधाकर पठारे यांचे अपघाती निधन

 महाराष्ट्र पोलिस दलावर शोककळा

वास्तव न्युज ओमप्रकाश उढाण 

    महाराष्ट्र पोलिस दलातील प्रतिष्ठित आयपीएस अधिकारी सुधाकर पठारे यांचे तेलंगणात झालेल्या भीषण अपघातात निधन झाले आहे. मिळालेल्या माहितीनुसार श्रीशैलम येथून नागरकुरनूलकडे प्रवास करत असताना, त्यांच्या कारची ट्रकसोबत भीषण धडक झाली, ज्यामध्ये त्यांचा जागीच मृत्यू झाला. या अपघातात त्यांच्या सोबत असलेले एक नातेवाईकही मृत्युमुखी पडले.

     सुधाकर पठारे हे २०११ बॅचचे आयपीएस अधिकारी होते आणि सध्या मुंबई पोलिस दलात पोर्ट झोनचे उपायुक्त (डीसीपी) म्हणून कार्यरत होते. आपल्या नातेवाईकांसह ज्योतिर्लिंग दर्शनासाठी जात असताना, हा दुर्दैवी अपघात घडला. त्यांच्या अपघाताची माहिती तेलंगणा पोलिसांनी मुंबई पोलिस दलाला कळवली आहे.

    सुधाकर पठारे यांची कारकीर्द अत्यंत प्रभावी आणि सेवा क्षेत्रातील विशेष मानली जाते. १९९५ साली स्पर्धा परीक्षा देऊन ते जिल्हा विशेष लेखा परीक्षक झाले होते. १९९८ मध्ये पोलिस उपअधीक्षक पदावर नियुक्त झाल्यानंतर त्यांनी अनेक ठिकाणी आपली सेवा बजावली. पंढरपूर, अकलूज, कोल्हापूर शहर, आणि राजुरा येथे त्यांनी पोलिस उपअधीक्षक म्हणून उत्कृष्ट कार्य केले.

    पठारे यांनी चंद्रपूर आणि वसई येथे अप्पर पोलिस अधीक्षक म्हणून सेवा दिली, तसेच अमरावती सीआयडी पोलिस अधीक्षक म्हणूनही त्यांनी काम पाहिले. मुंबई, ठाणे, पुणे, वाशी, आणि नवी मुंबई येथे पोलिस उपायुक्त पदावर काम करताना त्यांनी संघटित गुन्हेगारी, मोक्का, तडीपारी, आणि एमपीडीएसारख्या गंभीर कायदे अंमलबजावणीची धडक मोहीम राबवली.

   पोलिस दलात त्यांनी विविध उपक्रम राबवून कायदा व सुव्यवस्था राखली. सुधाकर पठारे यांच्या निधनामुळे महाराष्ट्र पोलिस दलावर शोककळा पसरली असून, त्यांच्या योगदानाची आठवण सदैव ताजी राहील.