लग्नाचे आमिष दाखवून तरुणीवर पोलीस शिपायाकडून अत्याचार

 जालना जिल्ह्यात गुन्हा दाखल;पीक मोबाईल पथकाकडे तपास सोपवला

       छत्रपती संभाजीनगर जिल्ह्यातील एका २४ वर्षीय तरुणीला लग्नाचे आमिष दाखवून जालना जिल्हा पोलीस दलातील एका पोलीस शिपायाने अत्याचार केल्याची खळबळजनक घटना उघडकीस आली आहे. जालना पोलीस दलात कार्यरत असलेल्या संशयित शिपाई संदीप वसंत सोनवणे (वय २८) याने या तरुणीला लग्नाचे आमिष दाखवून आपल्या जाळ्यात ओढले आणि तिच्यावर दोन महिने शारीरिक अत्याचार केले. असे तक्रारीत नमूद केले आहे. ही घटना पोलीस प्रशासनात धक्का देणारी असल्यामुळे कमालीची गुप्तता बाळगली जात आहे.

     शिपाई सोनवणे याने छत्रपती संभाजीनगर येथे नर्सिंग अभ्यासक्रम शिकणाऱ्या या २४ वर्षीय तरुणीला लग्नाचे वचन दिले आणि त्यानुसार ९ ऑक्टोबर २०२४ ते २ डिसेंबर २०२४ या कालावधीत पोलीस क्वार्टर्समध्ये सतत संबंध ठेवले. मात्र, नंतर सोनवणेने दुसऱ्या तरुणीसोबत लग्न ठरवल्याची माहिती त्या तरुणीला मिळताच तिने थेट जालना तालुका पोलीस ठाणे गाठून तक्रार दाखल केली.

    सदर तक्रारीनुसार, जालना पोलिसांनी भारतीय दंड संहितेच्या कलम ६९ अंतर्गत गुन्हा दाखल केला असून, या प्रकरणाचा तपास पिंक मोबाईल पथकाकडे सोपविण्यात आला आहे. पुण्यात घडलेल्या बलात्काराच्या घटनेच्या पार्श्वभूमीवर राज्यभरात वातावरण तापलेले असतानाच या घटनेमुळे पोलीस खात्याची अब्रू धोक्यात आल्यामुळे प्रशासनाने घटनेची गुप्तता पाळल्याचे समजते.

      पोलीस प्रशासनावरील या गंभीर आरोपांमुळे नागरिकांमध्ये संतापाची लाट उसळली आहे.