पळवून नेलेल्या अल्पवयीन मुलीचा एक वर्षानंतर शोध;प्रियकरासह ताब्यात!

 अल्पवयीन मुलीसह प्रियकराला सातारा जिल्ह्यातून अटक; उसतोडीचे काम करीत होते!

वास्तव न्युज ओमप्रकाश उढाण 

     जुना जालना येथील मोरंडी मोहल्ल्यातून एक वर्षापूर्वी पळवून नेलेल्या 13 वर्षे 6 महिन्याच्या अल्पवयीन मुलीचा शोध अखेर पोलिसांना लागला आहे. पीडित मुलगी तिच्या प्रियकरासह सातारा जिल्ह्यातील कराड तालुक्यातील खलकरवाडी येथे ऊसतोडीचे काम करताना सापडली. आरोपी सचिन बाबू गायकवाड (वय 21, रा. कैकाडी मोहल्ला, जुना जालना) याला अल्पवयीन मुलीसह ताब्यात घेण्यात आले आहे.

     पोलिसांनी दिलेल्या माहितीनुसार, 5 मार्च 2024 रोजी सचिन गायकवाड याने लग्नाचे आमिष दाखवून पीडित मुलीला फुस लावून पळवून नेले होते. याप्रकरणी कदीम जालना पोलीस ठाण्यात गुन्हा दाखल करण्यात आला होता. परंतु, एक वर्ष होऊनही मुलीचा ठावठिकाणा लागला नसल्याने प्रकरण पोलीस अधीक्षक अजय कुमार बन्सल यांनी अँटी ह्युमन ट्रॅफिकिंग युनिटकडे वर्ग केले.

     अँटी ह्युमन ट्रॅफिकिंग युनिटने या प्रकरणाचे तांत्रिक विश्लेषण करत आरोपी सचिन गायकवाड याची इत्यंभूत माहिती मिळवली. त्यानुसार, तो त्याच्या अल्पवयीन प्रेयसीसोबत सातारा जिल्ह्यातील खलकरवाडी शिवारात ऊसतोडणीचे काम करत असल्याची माहिती पोलिसांना मिळाली. लगेचच पोलीस पथक खलकरवाडी शिवारात पोहोचले आणि आरोपीला मुलीसह ताब्यात घेतले.

   सदर प्रकरणात मुलीला तिच्या नातेवाईकांच्या ताब्यात देण्याची प्रक्रिया सुरू असून, आरोपी सचिन गायकवाडला जालना येथे आणून कदीम जालना पोलिसांच्या स्वाधीन करण्यात आले आहे.

       ही कामगिरी पोलीस अधीक्षक अजयकुमार बन्सल, अप्पर पोलीस अधीक्षक आयुष नोपाणी, पोलीस उपअधीक्षक अनंत कुलकर्णी, स्थागुशाचे पोलीस निरीक्षक पंकज जाधव यांच्या मार्गदर्शनाखाली अँटी ह्युमन ट्रॅफिकिंग युनिटच्या पोलीस उपनिरीक्षक प्रियंका तुपे, पोलीस उपनिरीक्षक रवींद्र जोशी, सहायक फौजदार संजय गवळी, पोहेकॉं. सागर बावस्कर, महिला अंमलदार पुष्पा खरटमल, संगीता चव्हाण, आरती साबळे, रेणुका राठोड आणि चालक संजय कुलकर्णी यांनी यशस्वीरीत्या पूर्ण केली.

    सदर प्रकरणामुळे अल्पवयीन मुलींच्या सुरक्षेबाबत जनजागृती होण्याची गरज पुन्हा अधोरेखित झाली आहे.