पैठणहून परतताना दोन दुचाकीचा भीषण अपघात: एक ठार, दोन जखमी

एकादशी निमित्त पैठणहून दर्शन करून परतणाऱ्या भाविकावर काळाचा घाला 

वास्तव न्यूज ओमप्रकाश उढाण

     जालना जिल्ह्यातील अंबड तालुक्यात आज (७ जून) एक दुर्दैवी आणि हृदयद्रावक घटना घडली. एकादशी निमित्त पैठणहून दर्शन करून परतणाऱ्या भाविकांच्या दोन दुचाकींमध्ये चिंचखेड फाट्याजवळ भीषण अपघात झाला. या दुर्घटनेत शरद निवृत्ती वाघुंडे (वय अंदाजे ४५, रा. ताड हातगाव, ता. अंबड) यांचे जागेवरच निधन झाले असून दोन भाविक जखमी झाले आहेत. अशी प्राथमिक माहिती मिळाली.

दर्शनातून परतताना घडली दुर्घटना

    आज एकादशीच्या दिवशी ताड हातगाव येथील काही भाविक पैठण येथे श्री एकनाथ महाराजांच्या दर्शनासाठी गेले होते. दर्शन आटोपून परतीच्या मार्गावर चिंचखेड फाट्याजवळ दोन दुचाकींमध्ये समोरासमोर धडक झाली. धडक इतकी जोरदार होती की शरद वाघुंडे यांना गंभीर इजा होऊन त्यांचा मृत्यू घटनास्थळीच झाला.

अपघातामुळे दोन्ही दुचाकींचे मोठे नुकसान

   या अपघातात दोन्ही दुचाकींचे मोठे नुकसान झाले आहे. जखमी भाविकांना तातडीने अंबड येथील रुग्णालयात दाखल करण्यात आले असून त्यांच्यावर उपचार सुरू आहेत. अपघातानंतर परिसरात काही काळ वाहतूक ठप्प झाली होती.

   शरद वाघुंडे यांच्या आकस्मिक निधनामुळे ताड हातगाव परिसरात हळहळ व्यक्त होत आहे.