ऑपरेशन सिंदूर: भारताचा दहशतवाद्यांवर जोरदार प्रहार; पाकिस्तान आणि पीओकेतील ९ ठिकाणी हवाई हल्ले पहा बातमी व छायाचित्रे

 

वास्तव न्युज ओमप्रकाश उढाण 

    ७ मे रोजी भारताने पाकिस्तान आणि पाकव्याप्त काश्मीर (पीओके) मधील दहशतवाद्यांच्या अड्ड्यांवर मोठ्या प्रमाणात हवाई कारवाई केली. भारतीय सशस्त्र दलांनी 'ऑपरेशन सिंदूर' अंतर्गत एकाच वेळी नऊ ठिकाणी दहशतवाद्यांचे तळ उद्ध्वस्त केले आहेत. या कारवाईत दहशतवादी नेते हाफिज सईद आणि मसूद अझहर यांच्या लपण्याच्या ठिकाणांचा समावेश आहे.

हल्ल्याची ठिकाणे आणि परिणाम

    मिळालेल्या माहितीनुसार, भारताने मुझफ्फराबाद, बहावलपूर, मुरीदके, सियालकोट, कोटली, बाग, गुलपूर, भिंबर आणि शकरगढ येथील दहशतवाद्यांच्या अड्ड्यांवर टार्गेटेड हल्ले केले. या हल्ल्यांमध्ये कोणतेही पाकिस्तानी लष्करी आस्थापन लक्ष्य करण्यात आले नाही, हे विशेषतः स्पष्ट करण्यात आले आहे. मात्र बहावलपूरमध्ये मोठ्या प्रमाणावर नुकसान झाल्याची माहिती आहे आणि ३० जणांच्या मृत्यूची पुष्टी होत आहे.

बहावलपूरमध्ये मोठी हालचाल आणि इंटरनेट बंदीची शक्यता

      हल्ल्यानंतर बहावलपूर येथील रुग्णालयांमध्ये अफरातफरीचे वातावरण निर्माण झाले आहे. स्थानिक प्रशासनाने या परिस्थितीवर नियंत्रण मिळवण्यासाठी तयारी सुरू केली आहे. तसेच, बहावलपूरसह पाकिस्तानच्या पंजाब प्रांतातील काही भागांमध्ये इंटरनेट सेवा बंद केली जाण्याची शक्यता वर्तवली जात आहे.

जागतिक मीडिया प्रतिक्रिया

    या कारवाईनंतर गेटी, ईपीए आणि रॉयटर्स या आंतरराष्ट्रीय फोटो एजन्सींनी हल्ल्याचे दृश्य दाखवणारी छायाचित्रे प्रसिद्ध केली आहेत. ७ मे २०२५ रोजी घेतलेल्या या छायाचित्रांमधून विविध ठिकाणी झालेल्या नुकसानीचे आणि कारवाईच्या परिणामांचे दृश्य स्पष्टपणे दिसते.

भारत सरकारचे अधिकृत विधान

    सरकारने जारी केलेल्या निवेदनात स्पष्ट केले आहे की, ऑपरेशन सिंदूरचा उद्देश केवळ दहशतवाद्यांच्या अड्ड्यांचा नाश करणे हा आहे. भारताने कोणत्याही प्रकारे पाकिस्तानच्या औपचारिक लष्करी ठिकाणांवर हल्ला केला नाही. ही कारवाई देशाच्या सुरक्षेसाठी अत्यावश्यक असल्याचेही नमूद करण्यात आले आहे.