जालना - पोलीस हवालदार लाचेच्या जाळ्यात

 चार हजाराची लाच घेताना पकडले: जालना लाचलुचपत प्रतिबंधक विभागाची कारवाई

वास्तव न्युज ओमप्रकाश उढाण 

    पोलीस ठाण्यात दाखल असलेल्या एका गुन्ह्याच्या संदर्भात मदत करण्याच्या मोबदल्यात पोलीस हवालदार लाच घेताना रंगेहाथ पकडण्यात आलाय.

   मंठा पोलीस ठाण्यात कार्यरत असलेले पोलीस हवालदार राजू परसराम राठोड यांना लाच घेताना लाचलुचपत प्रतिबंधक विभाग, जालना यांनी रंगेहाथ पकडले. ही धडक कारवाई आज बुधवारी सांयकाळी करण्यात आली असून, एक खळबळजनक प्रकार समोर आला आहे.

    तक्रारदाराने दिलेल्या माहितीनुसार, मंठा पोलीस ठाण्यात दाखल असलेल्या एका गुन्ह्याच्या संदर्भात मदत करण्याच्या मोबदल्यात पोलीस हवालदार राठोड यांनी चार हजार रुपयांची लाचेची मागणी केली होती. तक्रारदाराने ही माहिती थेट लाचलुचपत प्रतिबंधक विभागाकडे दिली.

     संपूर्ण प्रकरणाची खात्री करून, विभागाने सापळा रचला आणि मंठा पोलीस ठाण्यासमोर असलेल्या एका हॉटेलमध्ये तक्रारदाराकडून चार हजार रुपये स्वीकारताना राठोड यांना रंगेहाथ पकडले. यानंतर त्यांच्यावर भ्रष्टाचार प्रतिबंधक कायद्यांतर्गत गुन्हा नोंदवण्यात आला आहे.