घनसावंगी - भीषण चोरी: वीस लाखांचे सोन्या-चांदीचे दागिने लंपास

ज्वेलर्स दुकान फोडून अज्ञात चार चोरटे पसार 

वास्तव न्युज ओमप्रकाश उढाण 

     जालना जिल्ह्यातील घनसावंगी तालुक्यात बुधवारी (दि. २३ जुलै) रोजी पहाटेच्या सुमारास एक मोठी चोरी घडली. कुंभार पिंपळगाव येथील प्रसिद्ध सराफा व्यावसायिक ज्ञानेश्वर ज्वेलर्स या दुकानाचे शटर तोडून अज्ञात चार चोरट्यांनी तब्बल ₹१९, ७६,५००/- किमतीचे सोन्या-चांदीचे दागिने लंपास केले. या चोरीमुळे संपूर्ण परिसरात प्रचंड खळबळ उडाली आहे.

 घटनेचा तपशील

     ही घटना दि. २३ जुलै २०२५ रोजी पहाटे ३:४२ ते ४ या वेळेत घडली असे तक्रारीत म्हटले आहे. चोरट्यांनी पूर्ण तयारीसह शटरचे कुलूप आणि चॅनल गेट फोडून दुकानात प्रवेश केला. काउंटरमधील ड्रम व लॉक फोडून विविध प्लास्टिकच्या बॉक्स व डब्यांमधील मौल्यवान दागिने लंपास करण्यात आले.

     फिर्यादी ज्ञानेश्वर मधुकर दहीवाळ यांनी घनसावंगी पोलिस ठाण्यात दिलेल्या तक्रारीत या घटनेचा सविस्तर उल्लेख केला आहे. या प्रकरणी घनसावंगी पोलिस ठाण्यात गु.र.नं. 392/2025 अन्वये कलम 331(4), 305(अ) भारतीय न्याय संहिता (BNS) अंतर्गत गुन्हा नोंदवण्यात आला आहे.

   घटनास्थळी उपविभागीय पोलीस अधिकारी विशाल खांबे, पोलीस निरीक्षक केतन राठोड, सपोनि खरात, पो.उ.नि. पवार यांनी भेट दिली.