मुलीचा वाढदिवस साजरा करण्यासाठी जात असताना काळाचा घाला: भीषण अपघातात तरुण ठार

 कुंभार पिंपळगाव-घनसावंगी रस्त्यावर दोन दुचाकीचा भीषण अपघात:गावात शोककळा

वास्तव न्युज ओमप्रकाश उढाण 

     कुंभार पिंपळगाव ते घनसावंगी रस्त्यावर ११ जुलै रोजी सायंकाळच्या सुमारास दोन दुचाकींमध्ये झालेल्या भीषण अपघातात गंभीर जखमी झालेल्या शंकर लक्ष्मणराव कंटुले (वय अंदाजे ३२) यांचे उपचारादरम्यान निधन झाले. हा अपघात सिंदखेड परिसरात झाला. 

    मिळालेल्या माहितीनुसार, शंकर कंटुले हे दुचाकीवरून काल ११ जुलै शुक्रवार रोजी निघाले होते. मात्र, सिंदखेड जवळ दोन दुचाकीचा भीषण अपघात झाला. यात दोन्ही दुचाकीस्वार गंभीर जखमी झाले. 

     अपघातानंतर शंकर कंटुले यांना तातडीने प्राथमिक उपचार करून गंभीर अवस्थेमुळे छत्रपती संभाजीनगर येथील रुग्णालयात हलवण्यात आले. परंतु दुखापतीचे स्वरूप गंभीर असल्यामुळे त्यांची प्रकृती अधिकच खालावत गेली आणि अखेर १२ जुलै रोजी (शनिवार) उपचारादरम्यान त्यांची प्राणज्योत मालवली. 

   दरम्यान शंकर आपल्या मुलीचा वाढदिवस साजरा करण्यासाठी अंबड येथे चालले होते अशी माहिती मिळाली.

   शंकर कंटुले याच्यावर आज कुंभार पिंपळगाव येथे अंत्यसंस्कार करण्यात आले त्यांच्या निधनाने गावात शोककळा पसरली आहे. त्याच्या संपर्कात असलेल्या कुटुंबीयांना व गावकऱ्यांना या अपघाताने प्रचंड धक्का बसला असून, सर्वत्र हळहळ व्यक्त होत आहे.