बीडमध्ये गोळीबार एक ठार ! पवनचक्की प्रकल्प पुन्हा चर्चेत

बीडमधील पवनचक्की प्रकल्प पुन्हा चर्चेत; सुरक्षारक्षकांचा चोरट्यांवर गोळीबार, एक ठार

वास्तव न्युज ओमप्रकाश उढाण 

    बीड जिल्ह्यातील लिंबागणेश परिसरात असलेल्या पवनचक्की प्रकल्पावर शुक्रवारी पहाटे घडलेल्या गोळीबाराच्या घटनेने परिसरात खळबळ उडवून दिली आहे. चोरीच्या उद्देशाने प्रकल्पात घुसलेल्या चोरट्यांवर सुरक्षारक्षकाने गोळीबार केला. या गोळीबारात एक चोरटा जागीच ठार झाला असून इतर चोरटे फरार होण्यात यशस्वी झाले आहेत. ही घटना नेकनूर पोलीस ठाण्याच्या हद्दीत २३ मे शुक्रवारी पहाटे सुमारे दोन वाजण्याच्या सुमारास घडली.

चोरट्यांचा मध्यरात्री प्रवेश, सुरक्षारक्षकांनी घेतली तत्काळ कृती

    प्राथमिक मिळालेल्या माहितीनुसार, पहाटे दोनच्या सुमारास काही अज्ञात चोरटे पवनचक्की प्रकल्पात चोरीच्या उद्देशाने शिरले. तेव्हा तेथे तैनात असलेल्या सुरक्षारक्षकाच्या हे लक्षात आले. चोरट्यांना रोखण्याच्या प्रयत्नात त्याने गोळीबार केला. गोळी लागल्यामुळे एक चोरटा जागीच ठार झाला. इतर चोरटे मात्र अंधाराचा फायदा घेत फरार झाले.

पोलिसांची तात्काळ कारवाई, तपास सुरु

    गोळीबाराची माहिती मिळताच पोलिसांनी घटनास्थळी धाव घेतली. मृत व्यक्तीची ओळख अद्याप पटलेली नसून, पोलीस अधिक तपास करत आहेत. सुरक्षारक्षकाची चौकशी सुरू करण्यात आली असून, त्याने कायद्याच्या चौकटीत कारवाई केली का, याचा तपास केला जात आहे.

पवनचक्की प्रकल्पावर पुन्हा एकदा संशयाची सावली

   बीडमधील पवनचक्की प्रकल्प गेल्या काही महिन्यांपासून विविध कारणांमुळे वादाच्या भोवऱ्यात सापडले आहेत. खंडणी, फसवणूक, स्थानिक वादविवाद, आणि गुन्हेगारी कृतीमुळे या प्रकल्पाकडे वारंवार लक्ष वेधले जात आहे. नुकत्याच घडलेल्या गोळीबाराच्या घटनेने या चिंतेत अधिक भर टाकली आहे.

स्थानिकांचा सुरक्षेसाठी आग्रह

   या घटनेनंतर स्थानिक नागरिकांत भीतीचे वातावरण निर्माण झाले आहे. त्यांनी पवनचक्की प्रकल्प परिसरात अधिक कडक सुरक्षा उपाययोजनांची मागणी केली आहे. तसेच, रात्रीच्या वेळी गस्त वाढविणे, सीसीटीव्ही व्यवस्थेत सुधारणा करणे, आणि प्रशिक्षित सुरक्षारक्षक नेमणे यासाठीही आवाज उठवला जात आहे.

    पोलीस याप्रकरणी सखोल तपास करत असून, चोरट्यांचा माग काढण्याचे काम युद्धपातळीवर सुरू आहे. घटनास्थळी मिळालेले पुरावे आणि मृत चोरट्याची ओळख पटवण्यासाठी फॉरेन्सिक तपास देखील सुरू करण्यात आला आहे.