जिल्हा परिषद शाळा झाली हायटेक शाळा: इंग्लिश स्कूलला लाजवेल अशा सुविधा

 

वास्तव न्युज ओमप्रकाश उढाण 

    घनसावंगी तालुक्यातील जिल्हा परिषद शाळा देवहिवरा आता एक अत्याधुनिक शाळा म्हणून ओळखली जात आहे. ही शाळा सध्या जिल्ह्यातील शैक्षणिक क्षेत्रात एक उत्तम उदाहरण ठरत आहे, ज्यामुळे इंग्लिश शाळांनाही लाजवेल असा या शाळेचा दर्जा आहे. या शाळेची भव्य-दिव्य इमारत, डिजिटल लायब्ररी, आणि दोन ते तीन एकरचे मोठे खेळाचे मैदान विशेष आकर्षण ठरली आहेत.

     शाळेमध्ये विविध खेळांसाठी उत्तम सुविधा आणि साहित्य उपलब्ध करून देण्यात आले आहे. यामध्ये फुटबॉल, हॉलीबॉल, बास्केटबॉल, बॅडमिंटन, क्रिकेट साहित्य, लेझीम, रिंग यांसारखे विविध खेळ समाविष्ट आहेत. विशेष म्हणजे ही सर्व सुविधा विद्यार्थ्यांसाठी मोफत उपलब्ध आहेत. खेळासोबतच शाळेच्या शैक्षणिक गुणवत्ता वाढवण्यासाठी डिजिटल लायब्ररीचीही मोठी भूमिका आहे.

    शाळेला स्टार्स प्रकल्पाअंतर्गत डिजिटल लायब्ररीची स्थापना करण्यासाठी एका कंपनीकडून दहा टॅब भेट देण्यात आले आहेत. हे टॅब विद्यार्थ्यांना शिक्षणाची नवी दिशा देणार आहेत, ज्यामुळे त्यांचे शिक्षण अधिक इंटरएक्टिव्ह व सुसंगत होणार आहे.

     विद्यार्थ्याचा सर्वांगीण विकास साधण्यासाठी समग्र शिक्षा अभियानांतर्गत शाळेला विविध प्रकारचे खेळ साहित्य देखील प्राप्त झाले आहे. यामुळे विद्यार्थ्यांचे शारीरिक आणि मानसिक आरोग्य सुधारण्यास मोठी मदत होणार आहे.

   घनसावंगी तालुक्यातील देवहिवरा शाळा विद्यार्थ्यांच्या विकासासाठी नव्या युगात एक आदर्श शाळा म्हणून ओळखली जात आहे.